Imbilin ti Sandiganbayan ti pannakakanselar ti pasaporte ti dati a kongresista a ni Zaldy Co ken tallo a kameng ti board of directors ti construction firm a Sunwest, Inc. ken indeklararna ida a kas pugante wenno fugitives from justice.
Kadagiti resolusion a nairuar idi Disiembre 10, binilin ti Sandiganbayan ti Department of Foreign Affairs (DFA) a madagdagus a kanselarenna ti pasaporte da Coken dagiti opisial ti Sunwest a da Aderma Angelie D. Alcazar, Cesar Z. Buenaventura, ken Noel Y. Cao gapu iti "inggagarada a panagkedked nga agpasakup iti nainlintegan nga autoridad ti korte."
Impinget ni Co iti panagtalinaedna iti ballasiw-taaw ken kinunana nga agsubli laeng no matungpal dagiti kalikagumanna a kondision a kas iti pannakaited ti house arrest wenno panagpiansa.
Kuna met ti Sandiganbayan a kadagitoy nga aramid ni Co, mangpasingked laeng iti nalawag a panggepna nga agtalinaed iti labes ti hurisdiksion ti korte.
Nadaras a pannakairuar ti ayuda kadagiti naapektaran ti didigra, imbilin ni Marcos
Maipapan met kada Alcazar, Buenaventura, ken Cao, kinuna ti Sandiganbayan a pagaammon dagitoy ti warrant-da ket iti laksid dagiti awag iti boluntario nga isusukoda, pinilida ti aglemmeng.
Adda tallo a kaso, a maysa kadagitoy ti non-bailable malversation of public funds through falsification of public documents, ti naipila kontra ken ni Co ken dagiti kakaduana nga akusado iti “naanomalia” a ₱289.5 a million a flood control project iti Naujan, Oriental Mindoro.
Malaksid ken ni Co, naidarum pay iti umuna a kaso ti graft da Department of Public Works and Highways (DPWH) Region IV-B Regional Director Gerald A. Pacanan III, Assistant Regional Director Gene Ryan A. Altea, Assistant Regional Director Ruben C. Santos Jr., Project Engineer III Felisardo S. Casuno, Materials Engineer Timojen A. Sacar, ken Quality Assurance and Hydrology Division OIC-Chief, Accountant IV Lerma D. Cayco, Planning and Design Division OIC-Chief Montrexis T. Tamayo, Maintenance Division Chief Juliet C. Calvo, ken ti board of directors ti Sunwest Corporation..
Ni laeng Co ti naidarum iti maikadua a kaso.
Iti maikatlo a kaso maipapan iti malversation of public funds, nainaganan ni Co ken amin a naidarum iti umuna a kaso ti graft.
Siamen nga opisial ti DPWH ti na-arraign iti saklang ti Fifth ken Sixth Divisions, da Pacanan, Altea, Santos Jr., Serrano, Casuno, Cayco, Calvo, Abagon, ken Tamayo.
Iti agdama, nakabalud iti Camp Karingal iti Quezon City ti babai nga akusado idinto a nakabalud iti Payatas new jail facility ti lalaki nga akusado. (Czarina Nicole Ong Ki/MB)
