SANTA, ILOCOS SUR. Iti panangidaulo ni P/Capt. Rovic R. Nelmida, hepe ti polisia iti Santa MPS, ken kas panangipatungpal iti pammilin ni Atty. Jeremy Jesus DP Bueno III a pannakaipanamnama ti panagari ti urnos ken talna ili ti Santa, Ilocos Sur itoy a panawen ti Paskua, naynay ti panagpatruliada kadagiti barangay iti igid ti baybay. Makita kadagiti ladawan (ngato ken baba) ti pannakiuman dagiti pannakabagi ti linteg kadagiti agbambannIit iti rangtay iti Barangay Calungboyan. Nagbalinen nga inaldaw a paset ti biag dagiti umili ti panagbanniitda iti rangtay a mangtantannawag iti baybay ken iti sabangan ti Karayan Banaoang a nalatag a pagruaran ti ipon. Malaksid kadagiti lumugar iti Santa, adu a sangsangaili ti aginaldaw nga agbanniit iti rangtay gapu iti kinalabon ti lames a makalapan. Maysa a tourist spot ti Santa ti rangtay a mangikonektar iti Calungboyan ken Rancho nga aw-awaganda pay iti “Golden Gate Bridge of Santa, Ilocos Sur.” (MARILYN CORRALES-CONTILLO)
