Binilin ti Appeals Chamber ti International Criminal Court (ICC) dagiti partido iti kaso ni dati a presidente Rodrigo Duterte a mangisubmitarda iti nayon a legal nga argumento, bayat ti panangadal dagiti hues no adda latta ti hurisdiksion ti ICC nupay immikkaten ti Filipinas iti Rome Statute.
Iti maysa a pammilin a naipablaak ita a lawas, binilin ti Appeals Chamber ti Prosecution ken ti Office of Public Counsel for Victims (OPCV) a mangipilada iti nayon a paliiwda agingga inton Enero 16, 2026, sa maikkan iti gundaway a sumungbat ti Depensa inton Enero 23, 2026.
Segun kadagiti hues, kasapulan dagiti nayon nga argumento tapno malawlawagan no kasano a mayaplikar dagiti kangrunaan a probision ti Rome Statute, nangruna iti hurisdiksion ken panagikkat iti ICC.
Imbilin ti Appeals Chamber kadagiti maseknan a partido nga idatagda dagiti interpretasionda iti Article 12(2) ken 13(c) ti Rome Statute, a mainaig iti hurisdiksion ti ICC, ken no kasano a maipatarus daytoy iti Article 127, a mainaig iti panagikkat iti ICC.
Senado, pinasingkedanna ti ₱6.793-trilion a nailian a badiet para 2026
Adda nadagsen nga epekto ti desision ti Appeals Chamber iti apelar mainaig iti hurisdiksion, ta daytoy ti mangikeddeng no agtuloy met laeng ti kaso kontra ken ni Duterte. (Argyll Cyrus Geducos/Manila Bulletin//Lito Hilidon/Bannawag)
