Agtakem manipud iti Pebrero 1-15, 2026 a bilang ti Bannawag ni Juan Alejo Asuncion a kas baro nga Editor ti Bannawag.
Simrek a kameng ti magasin idi 1998, nagpaay ni Asuncion, tubo ti Tabunay, Sarrat, Ilocos Norte, a Movie Editor ti magasin (2003-2005), sa Entertainment Editor (Hunio 6, 2005 a bilang agingga idi agtengnga ti 2006), sa Literary Editor iti 17 a tawen (manipud idi 2006 agingga iti Pebrero 1-15, 2024 a bilang); sa nadutokan a Managing Editor kalpasanna.
Premiado a mannurat, adun a sarita ken sumagmamano a nobela (prosa ken komiks) ti naipablaakna iti Bannawag, malaksid ti panagpaayna nga editor ken layout artist/cover designer ti adun a libro nga Ilokano.
Sublaten ni Asuncion ti puesto ni Cles B. Rambaud, tubo ti Pinili, Ilocos Norte, a nagpaay nga Editor ti Bannawag iti nasurok a 21 a tawen (manipud iti Hunio 6, 2005 agingga iti Enero 16-31, 2026 a bilang ti magasin). Agretiro ni Rambaud iti Enero 1, 2026. (Lito P. Hilidon)
