Binagkong ti maysa a mannalon ti kabsatna, a nakatayan daytoy, bayat ti panagririda idi kaaldawan ti Paskua, Disiembre 25, 2025, iti Barangay Alfonso, Gregforio del Pilar, Ilocos Sur, segun iti report ti polis ita a Lunes, Enero 5.
Binigbig ni Police Capt. Floro DR Cosning Jr., acting chief ti Gregorio del Pilar Municipal Police Station, ti biktima a ni Rudy, agtawen ti 29.
Kinuna ni Cosning a nagsinnungbat ti biktima ken ti suspek a ni Mar, 26, bayat ti panaginumda iti balayda.
Nangala ti suspek iti 10 a pulgada ti kaatiddogna a kutsilio iti kosina ken binagkongna ti kabsatna.
Naitaray ti biktima iti ospital a nakaideklararana a natayen.
Araw ng Kagitingan, rinambakan ti LGU Narvacan iti Junction War Memorial
Natiliw ti suspek ken naala kenkuana ti kutisilio nga inusarna iti pammagkong. Addan iti kustodia ti polis daytoy.
Kinuna ti pamilia ti biktima nga idarumda iti kaso a homicide ti suspek. (Freddie Lazaro/MANILA BULLETIN)
