Impetteng ni Assistant Minority Leader Lanao del Sur 1st district Rep. Zia Alonto Adiong nga ituloy a suroten ti Kamara ti paglintegan iti proseso ti impeachment.
"Maysa a serioso a proseso ti Konstitusion ti impeachment. Agtultuloy a tungpalen ti Kamara ti annongenna iti naurnos, maibasar iti linteg, ken nasin-aw a wagas," kuna ni Adiong idi Enero 22.
Kinuna daytoy ni Adiong sumagmamano nga oras kalpasan a impila dagiti militante a grupo ti maikadua nga impeachment complaint kontra ken ni Presidente Marcos Jr. iti Office of the Secretary General ti Kamara. Nupay kasta, saan nga opisial a naawat ti Secretary General ti 37-panid nga impeachment complaint gapu ta awan ni Secretary General Cheloy Garafil.
Ngem nangibati dagiti grupo ken dagiti nangyendorso iti impeachment complaint manipud iti Makabayan bloc iti kopia ti impeachment complaint iti uneg ti opisina ni Garafil.
₱800 a nayon iti binulan a sueldo dagiti katulongan iti NCR, marugian inton Pebrero 7
Segun ken ni Adiong, adda naikeddeneg nga opisial a biahe ni Garafil iti ballasiw-taaw, ngem saan nga apektaran ti kaawanna ti nainkalintegan a pannakataming ti impeachment complaint.
Kinuna ni Adiong, kameng ti Lakas-Christian Muslim Democrats (CMD), nga apaman a maipila ti impeachment complaint, masapul a tamingen daytoy ti Kamara a maitunos iti naituding a proseso, agraman ti pannakayendorso daytoy iti Committee on Justice tapno makitada no "sufficient in form and substance" daytoy.
Iti agdama, maymaysa pay laeng ti naberipikar ken nayondorso nga impeachment kontra ken ni Marcos -- ti impila ni abogado Andre de Jesus idi Enero 19 -- ti pormal nga inawat ti Secretary General.
Manamnama nga agsublin ni Garafil iti trabahona inton Enero 26, a panagsubli ti plenary session ti Kamara kalpasan ti makabulan a holiday break. (Ellson Quismorio/Manila Bulletin//Lito Hilidon/Bannawag)
