SALOMAGUE, CABUGAO, ILOCOS SUR. Simmanglad ti MV Luminara, ti kabaruan nga ultra-luxury superyacht ti The Ritz-Carlton Yacht Collection iti pantalan ti Salomague, Cabugao, Ilocos Sur idi Enero 15, 2026, a naglaon iti 213 a VIP a nadumaduma a nasionalidad ken 379 a crew. Pinasangbay ida ti probinsia ti Ilocos Sur, a nangiparang iti nabaknang a kultura, kinamanagpartuat ken naidumduma a panangsangaili dagiti Ilokano babaen ti cultural performances manipud iti Aweng ti Kawayan ti LGU Cabugao, Lapogueños TRIBuri Performers ti San Juan, ken PGIS dancers. Nagpasiar iti nadumaduma a tourist spots iti probinsia dagiti sangaili ken rinamananda dagiti lokal a potahe ti Ilocos Sur bayat ti sumagmamano nga oras a kaadddada ditoy. Ti isasangbay ti MV Luminara ti Ritz-Carlton ti mangipakita nga aglatlataken ti Ilocos Sur kas kangrunaan a tourist destination ken mangitunda iti pannakairaman ti probinsia iti mapa ti turismo iti sangalubongan. (Teksto: Mancielito S. Tacadena/Ladawan: Provincial Government of Ilocos Sur)
