Ti panagsusupiat iti West Philippine Sea (WPS) ket maysa a napaut, ken karit iti mapasungad a henerasion nga agkasapulan ti panagteppel, panagtutunos, ken natibker a panangsurot iti internasional a linteg, segun iti maysa nga opisial ti National Maritime Council (NMC), bayat nga agtultuloy a sangsanguen ti Filipinas dagiti agresibo nga aramid ken retorika manipud iti China.
Iti maysa nga interbiu, kinuna ni panakangiwat ti NMC Alexander Lopez a saan a ti apagbiit laeng a pannakisango ti parikut, no di ket ti kaadda ti natibker a pagtaktakderan ti pagilian nga agtalinaed iti labes ti maysa nga administrasion.
Segun ken ni Lopez, agpaut ti pannakirupir iti WPS isu a naannad ken serioso ti panangtaming ti gobierno iti daytoy a karit babaen ti natalna, legal, ken napnuan prinsipio a wagas.
Sinupiat ni Lopez ti ibagbaga ti China a panangprobokar ti kaadda dagiti Filipino a mangngalap iti WPS, idinto a nainkalintegan dagitoy nga aktibidad kas maitunos iti United Nations Convention on the Law of the Sea (UNCLOS).
Ombudsman Remulla, paspasungbaten ti Korte Suprema iti petision ni Zaldy Co
Innayon ni Lopez nga awan ti legal a pagbatayan ti China iti internasional a linteg iti pammabasolna a ti Filipinas ti mangpatpataud iti riri, idinto a ti China ti namin-anon a nangipaturong iti water cannon, nangdungpar, nangipaturong iti laser, ken nangriribuk kadagiti resupply mission ti Filipinas.
Nupay kasta, kuna ni Lopez a silulukat latta ti Filipinas iti diplomatiko a pannakiuman ti China, ngem saan a maisakripisio ti interes ti pagilian ken ti kalintegan daytoy iti bukodna a teritorio. (Argyll Cyrus Geducos/Manila Bulletin//Lito Hilidon/Bannawag)
