Maysa ni Honor Blanco Cabie, Pambansang Ulirang Ama Awardee ken dati a presidente ti GUMIL Filipinas ken Metro Manila, kadagiti 30 a napili a pakaipaayan ti Distinguished Bedan Award manipud iti San Beda University Alumni Association.
Maipaay ken ni Cabie, maysa nga associate professor a nangisuro iti journalism ken literatura iti dandani 20 a tawen iti nadumaduma a kolehio ken unibersidad iti Metro Manila, bayat ti tinawen a Red and White Ball inton Marso 1, 2026, iti Fiesta Pavilion ti Manila Hotel.
Sumagmamano a tawen kalpasan ti panagturposna, ken kalpasan ti panagpaayna iti Reuters News Agency a nagsuratanna kadagiti damag maipanggep kadagiti prisoners of war (POW) manipud iti Vietnam idi 1973 ken sakbay ti isusuko ti Saigon idi 1975, nadutokan a coach ti San Beda College of Arts and Sciences Debate team a nangubonanda kadagiti adu a pammadayaw malaksid ti panagpaayna a kas Faculty Adviser dagiti news ken literary publications.
Bayat met ti panangisursurona idi iti Far Eastern University, dinutokan ni university president Edilberto de Jesus a kas coach ti FEU Oratorical and Debate Club a nangabak iti Devesa Cup iti De la Salle University idi 1996 malaksid pay iti panagpaayna a kas Faculty Adviser ti FEU Advocate bayat pay ti panagsursuratna iti Bannawag.
VP Sara, tinagibassitna ti impeachment complaint iti Kamara
Nagturpos ni Cabie iti journalism, kas honorable mention, manipud iti dati a San Beda College. Addaan iti dua a masteral degree manipud iti Asian Institute of Journalism and Communication – maysa iti media management ken sabali iti journalism – a pagpapaayanna a presidente ti alumni association ken lyricist ti AIJC hymn.
Kas agiwarwarnak, nairaman kadagiti ininterbiuna dagiti nalatak a personalidad a kas kada South Korean President Chun Doo-Hwan, China's paramount leader Deng Xiao Ping, Indonesian President Suharto, Cambodian Prince Sihanouk, ken prisoner of war Lt. Cmdr. John McCain a nabotosan idi agangay a US senator.
Tallopulo ket dua a tawen sakbay a maipaay ken ni Cabie ti Distinguished Bedan Award, pinadayawan ti San Beda College Alumni Association a kas Outstanding Alumnus iti seremonia a naangay iti Mendiola campus, ken 26 a tawen sakbayna, napadayawan nga Outstanding Alumnus ti AIJC.
Maipaay ti Distinguished Bedan Award iti asino man a nagturpos iti San Beda a nakaipaay iti pagtamdan a serbisio kadagiti umili a Filipino ken impaneknekna a mabalin nga agpaay a pagwadan dagiti estudiante ken nagturpos iti San Beda University iti amin a henerasion, impakitana ti lideratona ken nakaaramid kadagiti naisangsangayan a gapuanan iti tay-ak a pinilina, nga iti biangna, iti media/communications; ken naibudi iti kinataona dagiti tagipatgen ti maysa a Benediktino: pammati, pannakaammo, ken kinasayaat ti kinatao.
Iti agdama, agpapaay ni Cabie nga Opinion ken Foreign News Editor ti Manila Standard. Tubo ti Pinili, Ilocos Norte ken maysa a Lifetime Member ti National Press Club.
