Inkeddeng ti Pre-Trial Chamber I (PTC 1) ti International Criminal Court (ICC) a kabaelan ni dati a presidente Rodrigo Duterte ti sumango iti pre-trial proceeding ket intudingda a maangay ti confirmation of charges hearing inton Pebrero 23, 2026.
Buklen ti PTC 1 dagiti hues a da Presiding Judge Iulia Antoanella Motoc, Judge Reine Adélaïde Sophie Alapini-Gansou ken Judge María del Socorro Flores Liera.
Iti maysa nga statement itay Enero 26, saan nga inawat ti PTC 1 ti kiddaw ti depensa a mangisardeng pay laeng iti proseso ti korte gapu iti kunada a saan a kabaelan ni Duterte ti makipaset iti kasona.
Tallo nga independiente a medical expert ti pinusgan ti PTC 1 a mangeksamen ken ni Duterte ket inawatda ti report dagiti eksperto idi Disiembre 5. Segun iti ICC, naikkan iti gundaway amin a partido -- prosekusion, depensa ken ti Office of Public Counsel for Victims -- a mangidatag iti paliiwda mainaig iti natakuatan dagiti eksperto iti medisina.
Tignay ti Kamara iti kaso nga impeachment kontra ken ni VP Sara, maammuan ita nga aldaw
Kalpasan ti panangipakatda kadagiti umno a legal a pagalagadan, ti panangsukimat dagiti eksperto iti medisina, ken ti pakabuklan a kasasaad ti kaso, inkeddeng ti PTC 1 a kabaelan ni Duterte nga usaren dagiti kalinteganna.
Kuna ti ICC a mangipaulogda iti sabali pay a pammilin a mangikeddeng iti detalye ken annuroten iti hearing, agraman ti ania man a wagas nga irekomendar dagiti eksperto iti medisina, tapno mapasayaat ti pannakipaset ni Duterte.
Inlawlawag ti ICC a ti confirmation of charges hearing ti mangikeddeng no umdas met laeng dagiti ebidensia a mangibutaktak iti kinapudno a naaramid ni Duterte dagiti krimen a nakaidarumanna.
No nakompirmar ti maysa wenno ad-adu pay a kaso, yallatiw ti ICC ti kaso iti Trial Chamber, nga isuda ti mangiwayat iti pannakausig ti kaso. (Argyll Cyrus Geducos/Manila Bulletin//Lito Hilidon/Bannawag)
