Agapelar dagiti abogado ni dati a presidente Rodrigo Duterte iti pangngeddeng ti Pre-Trial Chamber 1 ti International Criminal Court (ICC) a kabaelan ni Duterte ti sumango iti pannakausig, nga inkalinteganda a saan a naikkan iti due process ni Duterte.
Impeksa ni Nicholas Kaufman, abogado ni Duterte, ti pannakaupayna kalpasan nga inlaksid ti Pre-Trial Chamber 1 (PTC 1) idi Enero 26 ti kiddawda a maipasardeng ti pannakausig ni Duterte gapu ta saanna a kabaelan ti makipaset iti kaso.
Segun ken ni Kaufman, naupayda ta maisupadi iti gagangay a maaramid, saanda a naikkan iti gundaway a mangipresentar iti bukodda a medikal nga ebidensia ken mangkuestionar, iti korte, iti agsusungani a resulta ti panangsukimat dagiti medical expert a pinusgan dagiti hues.
Innayon ni Kaufman a kiddawenda iti ICC ti panangyapelarda iti desision ken inkalinteganna a saan a naikkan ti due process ni Duterte.
Kalpasan a naipaulog ti desision ti PTC 1, inkeddengdan ti pannakaisubli ti pre-trial proceeding ken confirmation of charges iti kaso ni Duterte inton Pebrero 23.
Petision ni Manases Carpio kontra iti kaso nga impeachment ni VP Duterte, inlaksid ti korte
Innayon ti ICC a mangipaulogdanto iti sabali pay a pammilin a mangikeddeng iti detalye ti aldaw ken pagannurotan iti maangay a hearing, agraman ti ania man a wagas nga irekomendar dagiti eksperto iti medisina a mangpasayaat iti pannakipaset ni Duterte. (Joseph Pedrajas/Manila Bulletin//Lito Hilidon/Bannawag)
