Nangrugin ti panawen ti panangipila iti impeachment iti Kamara kalpasan a nagsasaruno a naidatag ti dua a beripikado ken nayendorso nga impeachment complaint kontra ken ni Bise Presidente Sara Duterte ita nga aldaw, Pebrero 2.
Mapan a 45 a kameng ti militante a grupo ken dati a kongresman ti Makabayan bloc ti immuna a nangipila iti kaso nga impeachment ken ni Duterte iti opisina ni Secretary General ti Kamara Cheloy Garafil itay 8:40 iti agsapa, idinto a 17 a kameng ti civil society ken religious group ti nangipila iti maikadua nga impeachment complaint itay 10:12 iti agsapa.
Inyendorso dagiti kongresman ti Makabayan bloc ti immuna nga impeachment complaint a da ACT Teachers Party-list Rep. Antonio Tinio, Gabriela Party-list Rep. Sarah Elago, ken Kabataan Party-list Rep. Renee Co. Da Mamamayang Liberal (ML) Party-list Rep. Leila de Lima ken Akbayan Party-list Rep. Perci Cendaña ti nangyendorso iti maikadua.
Nagsasaruno a naidatag dagiti dua nga impeachment complaint kabayatan a rinugian ti Committee on Justice ti Kamara a tamingen ti dua nga impeachment complaint a maibusor ken ni Presidente Marcos Jr.
Pannakaimbestigar ti mining permit iti Dupax del Norte, kiniddaw ni Sen. Pangilinan
Kinuna dagiti nangipila iti impeachment complaint kontra iti bise presidente a saan pay a natingiting dagiti merito ti kaso nga impeachment a naipila idi maika-19 a Kongreso.
Iti sabali a bangir, kinuna ti kampo ni Duterte a sisasagana daytoy a mangsango iti baro a kaso ti impeachment iti umno ken nainkalintegan a proseso. (Ellson Quismorio/Manila Bulletin//Lito Hilidon/Bannawag)
