Rambakan ti probinsia ti Ilocos Norte ti maika-208 a tawen ti pannakaibangonna kas probinsia mangrugi ita nga aldaw, Pebrero 2.
Idauluan ni Gobernador Cecilia Araneta-Marcos ti panglukat a seremonia iti provincial capitol iti Siudad ti Laoag, Ilocos Norte.
Makabulan a rambakan ti probinsia ti pannakabangonna, ken maiwaras ti nasurok a ₱95 a milion a balor ti tulong, proyekto, ken serbisio tapno mapapigsa dagiti komunidad a pagnumaran ti agarup 2,800 a kameng ti komunidad, mangmangged, ken dadduma pay a maseknan iti nadumaduma a sektor ti pagbiagan.
Segun ken ni Marcos, daytoy ti mangipakita iti panangpadur-as ken panangpapigsa ti gobierno ti probinsia iti agrikultura ken panagkalap babaen ti panangtedda iti alikamen a pagtalon, taraknen, ken suplay ti panagmula.
Dua nga umili ti Santa, Ilocos Sur, naipaayan iti Fr. Jose Burgos Award
Maitampok iti panglukat a programa ti presentasion ti Little Provincial Officials, a mangipakita kadagiti agtutubo nga Ilokano kas simbolo ti mapasungad a daulo, ken ti pannakaiparang iti commemorative coin ti Bangko Sentral ng Pilipinas a mangpadayaw iti Tan-ok ni Ilocano, ti kangrunaan a cultural festival ti probinsia.
Manipud Pebrero 4 agingga 20, iwayat ti gobierno probinsial ti “Pasyar: Open Ilocos Norte Tours for Pupils,” ti baro a programa para iti edukasion a mangted tii gundaway kadagiti estudiante a sumarungkar kadagiti opisina ti gobierno, heritage site, ken kangrunaan a pagpasiaran dagiti turista.
Agleppas ti selebrasion inton Pebrero 28 a pannakaangay ti Tan-ok ni Ilocano: Festival of Festivals, a pagdadap-ayan dagiti nadumaduma a local festival ti probinsia iti maysa a dakkel a pannakaipabuya iti kultura. (Freddie Lazaro/Manila Bulletin//Lito Hilidon/Bannawag)
