Tarigagay ti Committee on Social Justice, Welfare and Rural Development ti Senado nga ipasdek ti magun-odan ti amin a pannakaiwaras iti tulong ti gobierno, a mangikkat kadagiti saan a kasapulan a rekititos ken panangpolitika a gagangay a mainaig kadagiti programa nga ayuda ti gobierno.
Daytoy ti inkari ni Senador Erwin Tulfo a daulo ti komite, iti naangay a hearing maipanggep iti gakat a linteg a mangipasdek iti Assistance to Individuals in Crisis Situation (AICS) a programa ti Department of Social Welfare and Development (DSWD).
Iti agdama, adu a rekititos ti kasapulan tapno makaala iti tulong ti gobierno kas iti valid ID, Certificate of Indigency, Barangay Clearance, notarized affidavit, Social Case Study Report, ken no dadduma, uray marriage certificate.
Segun ken ni Tulfo, pagbalinenna laengen a dua ti rekititos, ket paikkatna dagiti saan a kasapulan a rekititos kas iti barangay indigency form ken marriage contract, ket no kasapulan ti tulong medikal, maysa laeng a valid ID ken bill iti ospital ti iparang.
Nadaras a pannakairuar ti ayuda kadagiti naapektaran ti didigra, imbilin ni Marcos
Kinuna ni Tulfo a maliklikan ti pannakibiang ti politiko iti pannakaiwaras iti tulong no mapalaka ti proseso ti panangala iti tulong ti gobierno.
Iti sabali a bangir, binilin ni Tulfo ti Department of Interior and Local Government (DILG) a pardasanda nga iwaragawag ti impormasion a mangilawlawag maparitan dagiti politiko a makibiang iti panangiwaras iti tulong, kas maitunos iti 2026 General Appropriations Act. (Hannah L. Torregoza/Manila Bulletin//Lito Hilidon/Bannawag)
