Naminsan pay, naibandera iti naiwayat a 2026 Ilocos Sur Festival Trade and Food Fair dagiti maipagpannakkel a produkto ken pamastrekan ti Santa, Ilocos Sur a kas kadagiti napintas ti pannakatenneb ken pannakapandayna a buneng, napintas ti pannakaabelna nga ules ken tela, kasta met dagiti lokal a produkto manipud iti lokalidad a mangipakita iti nakayanakan a laing ken kabaelan ken nakaibugasan met ti nabaknang a kultura ti komunidad.
Dagiti produkto ti mangipakita iti dedikasion dagiti umili nga agparpartuat ken ti agtultuloy a kinabaknang ti tradision ti ili a Santa, kas kinuna ni Mayor Jeremy Jesus Bueno III.
Daytoy ti selebrasion ti craftsmanship, nagtitinnawidan a kannawidan, ken maipannakkel nga abel dagiti annak ti Santa.
Adu ti nangdayaw a turista iti panangbisitada iti Ilocos Sur Festival Trade and Food Fair ken napaneknekanda ti kinaautentiko dagiti produkto a pakabigbigan ti Santa – ti kakaisuna nga ili iti Ilocos Sur a pakakalapan iti agdindinamag nga ipon. (Marilyn Corrales-Contillo)
