ADU ti nangraem iti naaramid a “Festival Arch of Santa” a naitampok iti 2026 Ilocos Sur Festival. Kas panangilawlawag ni Atty. Jeremy Jesus Bueno III, Municipal Mayor ti Santa, Ilocos Sur, ti Festival Arch a naipasdek iti nadaeg a Gabriela Silang Park iti sango ti Balay ti Ili ti simbolo a mangiparangarang iti pakabuklan ti nabaknang a pakasaritaan ti lokalidad. Karaman ditoy dagiti nalatak a produkto a kas iti abel iti Santa a daydaywen dagiti turista a gatangen, ti buneng iti Santa, ti maipagtangsit a naparnuay babaen ti ginasgasut a tawen a nagtitinnawidan a laing dagiti agpampanday iti lokalidad, dagiti labba ken bigao iti Santa, kasta met ti maipangpangruna nga ipon iti Santa. Ti arko ti agpaay a “cultural landmark” iti ili ta ti nakaisigudan a talento dagiti umili ti naipanayag iti pannakarambak ti maika-208 a tawen ti anibersario ti probinsia. Mabigbigbig ti Santa a kas nakayanakan ni Gabriela Silang, ti mabibigbig nga umuna a henerala iti rebolusion, ken nalatak pay iti balligi a panangtaginayonna iti nabaknang a kultura ken tradision dagiti umilina. (MARILYN C. CONTILLO)
