Pinatgan ti Pre-Trial Chamber I (PTC 1) ti International Criminal Court (ICC) ti kiddaw ni dati a presidente Rodrigo Duterte a mangilaksid iti kalinteganna a dumar-ay iti confirmation of charges hearing a maangay inton umay a lawas.
Iti pangngeddeng nga impaulog ti PTC 1 idi Pebrero 20, kunada a maangay latta ti confirmation of charges iti laksid ti kaawan ti suspek.
Rimmuar daytoy a pangngeddeng kalpasan nga indatag ti depensa idi Pebrero 19 ti kiddaw ni Duterte nga ilaksidna ti kalinteganna a dumar-ay iti bista.
Segun ken ni panakangiwat ti ICC Oriane Maillet, nakita dagiti hues a natungpal ti dokumento a pinirmaan ni Duterte ti Article 61(2)(a) ti Rome Statute ken ti Rule 124 ti Rules of Procedure and Evidence, a mangipalubos iti suspek a mangilaksid iti kalinteganna a dumar-ay iti confirmation of charges hearing.
Marcos, Robredo, nagsarak iti Naga city
Ngem inlawlawag ni Maillet a napatgan ti kiddaw ni Duterte saan a gapu iti kasasaad ti salun-atna no di ket iti kalinteganna iti waiver.
Segun iti PTC 1, binigbig ni Duterte, babaen ti surat, a maawatanna ti kalinteganna a dumar-ay ken ti pagbanagan ti panangiwaksi iti dayta a kalintegan, a naan-anay nga inlawlawag kenkuana ti abogadona.
Impaganetget ti ICC a nupay mabalin a maituloy ti confirmation hearing uray awan ti suspek, saanen a mabalin daytoy iti mismo a trial, kas sagudayen ti Article 63(1) ti Rome Statute. (Argyll Cyrus Geducos/Manila Bulletin//Lito Hilidon/Bannawag)
