Nakasublin iti pagilian dagiti 24 a Filipino a naipan ken napilit nga agtrabaho kas scammer iti Cambodia, segun iti Bureau of Immigration (BI) idi Pebrero 22.
Simmangpet dagiti biktima iti Ninoy Aquino International Airport (NAIA) idi Pebrero 14.
Segun ken ni Commissioner ti BI Joel Anthony M. Viado, saan a naipalgak ti nagan dagiti biktima a kaaduanna ket agtawen iti 20, ken impudnoda a naguyugoyda nga awaten ti trabaho babaen ti online a job advertisement a mangididiaya iti dakkel a sueldo.
Kinuna ni Viado a saan a legal dagitoy a trabaho, no di ket maysa nga organisado a panangallilaw a mangbiktima iti nadumaduma a pagilian.
Segun iti BI, napilit dagiti 20 a Filipino nga agtrabaho iti online “love scam” iti Cambodia kadagiti ganggannaet -- a kaaduanna ket taga-Estados Unidos ken Europa -- babaen ti online dating platform.
Apidabit ti tunggal maysa iti 18 nga ex-marines, kiniddaw ti Ombudsman
Kuna ti BI a guyugoyenda dagiti biktima iti panagpuonan iti cryptocurrency investment ken iti online casino link a maipatulod babaen dagiti nadumaduma a messaging app.
Innayon ti BI a rimmuar dagiti 16 a biktima kas turista, dua ti rummuar babaen ti saan nga umno a wagas, ken innem ti rimmuar a kas overseas Filipino worker. (Jeffrey Damicog/Manila Bulletin//Lito Hilidon/Bannawag)
