Rugian ti International Criminal Court (ICC) ita nga aldaw, Pebrero 23, ti confirmation of charges hearing kontra ken ni dati a presidente Rodrigo Duterte, kas paset ti pre-trial stage a mangikeddeng no agtultuloy ti kasona iti naan-anay a pannakabista.
Mangrugi ti bista iti 10:00 iti agsapa (iti The Hague) wenno inton 5:00 iti malem (iti Manila) iti saklang ti Pre-Trial Chamber I (PTC 1) ti ICC.
Buklen ti PTC 1 da Presiding Judge Iulia Antoanella Motoc ken da Judge Reine Adélaïde Sophie Alapini-Gansou ken María del Socorro Flores Liera.
Maangay ti bista iti Courtroom I iti Pebrero 23, 24, 26, ken 27.
Yantangay pinatgan ti PTC 1 ti kiddaw ni Duterte a saan a dumar-ay iti hearing, maangay ti hearing uray awan ti akusado.
Apidabit ti tunggal maysa iti 18 nga ex-marines, kiniddaw ti Ombudsman
Inlawlawag ni panakangiwat ti ICC Oriane Maillet a ti confirmation of charges hearing ket saan pay a panangbista, kayatna a sawen, saan nga ikeddeng no absuelto wenno masentensiaan ni Duterte.
Kinuna ni Maillet a tingitingen ti PTC 1 no umdas met laeng dagiti ebidensia a mangipaneknek nga inaramid nga agpayso ni Duterte dagiti kaso a nakaidarumanna.
Iti maaramid a bista, maikkan iti gundaway ti Prosekusion, Depensa, ken ti Legal Representative dagiti biktima a mangiparang kadagiti argumentoda iti merito ti kaso.
Tingitingen dagiti hues dagiti maidatag nga ebidensia a maitunos iti pagalagadan ti Rome Statute.
No makompirmar ti maysa wenno dua a kaso, mayallataw daytoy iti Trial Chamber para iti sumaruno a paset ti proseso.
Iti sabali a bangir, namakdaar ti pamilia Duterte nga awan ti mapalubosan a panangsarungkar iti dati a presidente bayat a maang-angay ti bista, ngem mapalubosan ti pannakisarita iti telepono.
Nangdutok ti pamilia ti Duterte iti abogadona a Filipino a dumar-ay met iti confirmation hearing, nga isu da Salvador Medialdea, dati a chairman ti Land Transportation Franchising and Regulatory Board (LTFRB) Martin Delgra III, dati a sekretario ti Department of Labor and Employment secretary (DOLE) Silvestre Bello III, dati a presidente ken CEO ti Pagcor Alfredo Lim Jr., dati a Bureau of Internal Revenue (BIR) commissioner Caesar Dulay, ken dati a chief presidential legal counsel Salvador Panelo.
Kalpasan ti uppat nga aldaw a panangbista, adda 60 nga aldaw dagiti hues a mangadal kadagiti ebidensia ken mangipaulog iti pangngeddengda. (Martin Sadongdong/Manila Bulletin//Lito Hilidon/Bannawag)
