Dagiti saan a nalpas ken saan a nagsisilpo a flood control ken drainage project ti makagapu iti nasaknap a panaglayus iti tallo a probinsia ti Davao Region (Region 11) a nakatayan ti walo a tao, segun iti nangato nga opisial ti Office of Civil Defense (OCD) idi Pebrero 22.
Segun ken ni Dir. Ednar Dayanghirang, regional director ti Region 11 (OCD-11), ti tudo a pinataud ti shear line ti mangap-apektar iti nadumaduma a paset ti rehion sipud pay idi napan a lawas.
Maibasar iti immuna a report ti OCD, naapektaran ti nasaknap a panaglayus ti Davao del Norte, Davao del Oriental, ken Davao de Oro.
Walo a tao ti natay: uppat iti Davao de Oro ken uppat met iti Davao Oriental, ket naaladan amin a bangkay.
Segun iti kaudian a report, adda pay natay iti Pantukan, Davao de Oro gapu iti panagreggaay iti bassit a pagminasan sadiay.
Apidabit ti tunggal maysa iti 18 nga ex-marines, kiniddaw ti Ombudsman
Inlawlawag ni Dayanghirang a ti nakapuy a pasdek iti pagayusan ti danum ti makagapu iti panaglayus, ta adu a kalsada ti naipatakder iti igid ti karayan ngem saan pay nalpas wenno nagsilpo dagiti proyekto a flood control ken drainage system.
Kuna ni Dayanghirang a kastoy ti mapasamak no nadumaduma a pangal ti gobierno ti mangipatungpal kadagiti kastoy a proyekto.
Innayon ni Dayanghirang nga indatagnan daytoy a parikut iti Department of Public Works and Highways (DPWH) ta adun a residente ti Davao ti naapektaran. (Martin Sadongdong/Manila Bulletin//Lito Hilidon/Bannawag)
