Pinanggep ni Presidente Marcos Jr. a rippuogen ni dati a presidente Rodrigo Duterte ken dagiti nagapuananna.
Daytoy ti imbatad ni Nicholas Kaufman, abogado ni Duterte, iti umuna nga aldaw ti confirmation of charges hearing iti International Criminal Court (ICC) idi Pebrero 23.
Segun ken ni Kaufman, adda iggemda a rekord ti panagsasarita iti telepono ti uppat a tattao, a maysa kadakuada ti nalimed a kadua ni Marcos, a mangipaayda iti testigo iti ICC.
Impaganetget ni Kaufman a saan a nainkalintegan ti pannakaipan ni Duterte iti The Hague.
Kinuna ni Kaufman a saan a mabalin nga ebidensia dagiti narasaw a sasao ni Duterte a mangitudo kenkuana a kas akin-aramid kadagiti pammapatay a napasamak bayat ti pannakaisayangkat ti war on drugs.
Apidabit ti tunggal maysa iti 18 nga ex-marines, kiniddaw ti Ombudsman
Innayon ni Kaufman a masapul a mangiparang ti prosekusion iti umdas a pammaneknek a nagayatan ken napakadaan ni Duterte ti pannakapapatay dagiti tattao kas resulta ti panagsaona.
Iti sabali a bangir, kinuna ti Malakanyang a minamaag ti alegasion ni Kaufman iti panangiramanda ken ni Marcos idinto ta idi pay la 2017 a naipila ti kaso ni Duterte iti ICC, ket saan pay a presidente ni Marcos idi.
Kinuna ni undersecretary ti Presidential Communications Office (PCO) Claire Castro a saan a nangipaay ni Kaufman iti natibker a depensa iti mapapati nga extrajudicial killings (EJK) ni Duterte. (Betheena Unite/Manila Bulletin//Lito Hilidon/Bannawag)
