"Saan a maikari iti panagraem."
Daytoy ti kinuna ni Maj. Gen. Vicente MAP Blanco III, commandant ti Philippine Marine Corps (PMC), ita nga aldaw, Pebrero 25, a panangkondenarna iti inaramid dagiti retirado a Marino a maipagarup a nagpaay kas bag man iti pannakaitulod ti ₱805 a bilion a kuarta a kickback manipud iti flood control projects kadagiti opisial ti gobierno.
Iti maysa nga statement, impaganetget ni Blanco a dagiti dishonorably discharged iti PMC ket saanda a mabalin nga agapaden ti pagsasao ti Marine Corps nga “Once a Marine, Always a Marine,” a pangikalintegan wenno tapno mapapati dagiti aramidda.
Kinompirmar ni Blanco a tallo kadagiti 18 a tao nga imparang ni abogado Levi Baligod iti kontrobersial a press conference iti a naangay iti Club Filipino iti San Juan City idi Pebrero 24 ket retirado a Marino a nagtignay a bukbukodda, ken impaganetgetna a boluntario ti inaramidda ket awan ti pammalubos ti PMC.
Iti sabali pay nga statement, nagballaag ti Armed Forces of the Philippines (AFP) mainaig iti alegasion ni Baligod, ket kunada a dagiti alegasion a naipalgak iti publiko ket masapul a matingiting iti umno a legal a proseso ken maipasidong iti panagimbestigar dagiti autoridad. (Martin Sadongdong/Manila Bulletin//Lito Hilidon/Bannawag)
