NARVACAN, ILOCOS SUR. Dagiti atleta manipud kadagiti nadumaduma a pagadalan iti daytoy nga ili a nangubon iti medalia iti kaiwaywayat nga Ilocos Sur Division Athletic Association Meet (ISDAAM) a naangay iti Pres. Elpidio Quirino Stadium iti Bantay, Ilocos Sur. Naipresentarda iti flag raising ceremony ti LGU Narvacan itay agsapa ti Peb. 23, 2026. Kinaragup ida da Mayor Edna Cabalo Sanidad, DMD, Bise Mayor Margarito Tejada, ken dagiti kameng ti Sangguniang Bayan ti Narvacan. Lima kadakuada ti nakagun-od iti balitok a medalia ken automatiko a makisalisalda iti Region 1 Athletic Association (RIAA) a maiwayat inton Abril 8-12, 2026. Dagiti lima a Gold Medalist: Chris Paul S. Calpo ti Paratong Elementary School (Table Tennis), Athena Gayle Natividad ti Nanguneg West Elementary School (Taekwando), Mark Daniel Ampo ti Narvacan South Central School (Basketball), ken da Jason Edward Bess III (Taekwando) ken Carlitos Joe C. Corrales (Badminton Boys) ti Narvacan Catholic School. Nangab-abaken ni Corrales iti Palarong Pambansa ket manamnama a pangnamnamaan met laeng ti Ilocos Sur itoy a masungad a Palaro. Nairaman pay iti ladawan dagiti dadaulo dagiti pagadalan, dagiti dadduma pay a nakagun-od iti pammadayaw, ken dagiti coach/trainor dagiti atleta. (ELISEO B. CONTILLO)
