Nangisayangkat dagiti kameng ti 1st Ilocos Sur Provincial Mobile Force Company (ISPMFC) iti panangidaulo ni Police Lt. Col. Jason T. Nadarisay, Force Commander, iti “Pailaw Project” iti Barangay Licungan, Sugpon, Ilocos Sur. Naiwayat ti aktibidad kas paset pay laeng ti maiganggannuat a Project TANGNAWA wenno Talingenngen ti Amin intay Gun-oden Natalinaay nga Aglawlaw Wayatayo nga Arakupen a proyekto ti 1st ISPMFC tapno matulongan dagiti agindeg kadagiti naseksek nga away iti kasasaad ti panagbiagda.
Malaksid iti Pailaw, mangisaysayangkat pay ti ISPMFC iti umasping a gannuat a kas iti Pabahay, ken Patubig projects. Kadua da Lt. Col. Nadarisay dagiti opisial ti barangay nga idauluan ni Brgy. Captain Jimino B. Manuel iti pannakaikabil dagiti silaw. Mainaig itoy, impeksa dagiti lumugar ti panagyamanda iti 1st ISPMFC ta saan laeng nga isuda ti maisagut iti poyekto no di pay ket dagiti agdaldaliasat iti nasao a lugar. (ELISEO B. CONTILLO)
