Imbatad ti Philippine Navy (PN) ita nga aldaw, Pebrero 25, a saan a kameng ti Philippine Marine Corps (PMC) ti uppat kadagiti maipagarup a kameng ti PMC, a nagpabigbig kas aide ni dati a kongresman Zaldy Co ken nagpaay a kas bagman dagiti nangato nga opisial ti gobierno, idinto a kaaduan kadagitoy ti maibilang a "dishonorably discharged."
Segun ken ni panakangiwat ti Navy Capt. Marissa Martinez, pulos a saan a kameng ti PN wenno PMC ti uppat kadakuada, idinto a kaaduanda dagiti dishonorably discharged iti serbisio. Sumagmamano kadakuada ti nagretiro iti nasayaat a kasasaad.
Inruar ti PN daytoy nga statement kalpasan a nagwaras ti video a mangipakpakita kadagitoy 18 a tao nga agkunkuna a nangitulodda iti ₱805 a bilion iti pagtaengan ni Presidente Marcos ken dati a House Speaker Martin Romualdez.
Saan nga imbatad ni Martinez ti nagan dagiti "dishonorably discharged" tapno saan a maibabain ti pamiliada.
Pinakdaaran ni Martinez ti publiko nga agridam ken sukimaten no agpayso ken nakapapati ti impormasion, agraman ti nagtaudan ken plataporma a nausar, tapno maliklikan ken maparmek ti panagwaras ti palso nga impormasion. (Priam Nepomuceno/PNA//Lito Hilidon/Bannawag)
