Mayendorson iti plenario ti Kamara ti Anti-Political Dynasty bill kalpasan ti dua a lawas, segun ken ni House Committee on Suffrage and Electoral Reforms Chairman Lanao del Sur 1st district Rep. Zia Alonto Adiong idi Pebrero 25.
Iti maysa a press conference, kinuna ni Adiong a nabukeldan iti komite ti maadaptar a gakat a linteg sa mayendorso iti plenario.
Insayangkat ti komite ti dua a lawas a public consultation iti singasing a linteg a nakaalaan dagiti kongresman iti napateg nga impormasion manipud kadagiti gagangay nga umili iti Cavite, Cebu, ken Misamis Oriental (Cagayan de Oro City).
Segun iti paliiw ni Adiong, 17 kadagiti 24 a bersion ti anti-political dynasty bill ti mangiparit iti agingga iti "second degree of consanguinity and affinity," idinto a basbassit dagiti mangiparit iti naing-inget a bersion a mangiparit iti agingga iti fourth degree (of consanguinity and affinity).
Dinakamat ni Adiong ti agdama a linteg kas iti SK (Sangguniang Kabataan) law a mangiparit iti agingga iti second degree; agraman ti BARMM (Bangsamoro Autonomous Region in Muslim Mindanao) electoral code, a mangiparit iti agingga iti second degree.
Apidabit ti tunggal maysa iti 18 nga ex-marines, kiniddaw ti Ombudsman
Innayon ni Adiong a no sukimaten dagiti linlinteg ken prinsipio ti demokrasia a masurot ti ad-adu ti bilangna, ad-adu ti sumuportar iti panangiparit kadagiti kabagian agingga iti second degree.
Pagtitiponen ni Adiong ti 24 a bersion ti anti-political dynasty bill a naipila iti komite tapno mabukel ti bersion nga adaptarenda, ket no maanamongan iti komite, maipanen iti plenario.
Nupay iparit ti 1987 Constitution dagiti political dynasty, awan pay ti naipasa ti Kongreso a linteg a mangipatungpal iti daytoy a probision iti napalabas nga uppat a dekada. (Ellson Quismorio/Manila Bulletin//Lito Hilidon/Bannawag)
