Gapu ta ammona a ti proseso ti impeachment kontra ken ni Bise Presidente Sara Duterte ket maibilang a pannakidangadang a mangallukoy iti puso ken panunot dagiti netizen, impasingked ni Batangas 2nd district Rep. Gerville Luistro idi Lunes, Marso 2 a saan a maitutop a lugar ti social media a mangrisut iti kaso.
Ngem agdesision ti Committee on Justice ti Kamara nga idadauluan ni Luistro a maibasar kadagiti maidatag nga ebidensia.
Inlawlawag ni Luistro a maysa a Konstitusional a proseso ti impeachment, saan a pasalip iti social media, isu a saan a pinnaaduan iti likes ti dangadang ditoy.
Ita a Lunes, Marso 2, ti umuna nga aldaw ti panangtaming ti Committee on Justice iti naberipikar ken nayendorso nga impeachment complaint a maibusor ken ni VP Duterte.
Binalakadan ni Luistro dagiti kakaduana iti komite nga agannad iti panangtungpalda iti annongenda a mangtaming iti kaso nga impeachment ni Duterte iti baet ti panagwaras ti palso nga impormasion ken fake news.
Apidabit ti tunggal maysa iti 18 nga ex-marines, kiniddaw ti Ombudsman
Segun ken ni Luistro, saan a rumbeng nga agulimek lattan no adda maiwaras a fake news, ngem kasapulan ketdi ti panangsukimat tapno malawagan ken saan a maiwawa iti palso nga impormasion.
Sinungbatan ni Luistro ti palso nga impormasion nga agwarwaras iti social media a nalpasen a nagdesision ti Korte Suprema (SC) mainaig iti merito ti impeachment ni Duterte idi napan a tawen, idinto a kinapudnona, ti laeng one-year bar rule ti dinakamat ti SC. (Ellson Quismorio/Manila Bulletin//Lito Hilidon/Bannawag)
