Naluktan manen ti Cabagan-Santa Maria Bridge ita nga aldaw, Marso 2, kalpasan a mapatakder ti landok a rangtay mamagsilpo iti pasetna a narsuod, a nangisubli iti pagdalanan dagiti agbibiahe.
Indauluan ni Department of Public Works and Highways (DPWH) Secretary Vivencio Dizon ti seremonia, kaduana da House Speaker Bojie Dy, House Minority Leader Marcelino Libanan, Gobernador Rodito T. Albano, Bise Gob. Kiko Dy, Rep. Tonypet Albano, ken dagiti lokal nga opisial.
Nairingpas ti pannakaipatakder manen ti rangtay iti las-ud ti dua a bulan kalpasan ti pammilin ni Presidente Marcos Jr. ken kiddaw dagiti umili.
Segun iti DPWH-Region 2, maluktan ti rangtay kadagiti lugan nga agpatingga laeng iti 3 a tonelada ti kadagsenna ken 2.5 a metro ti katayagna.
Nagyaman ti DPWH iti kooperasion ti publiko ken kiniddawna kadagiti drayber a surotenda dagiti pagannurotan para iti natalged a panagballasiw iti rangtay. (Liezle Basa Iñigo/Manila Bulletin//Lito Hilidon/Bannawag)
