Dagiti lugar nga adda iti babaen ti EDCA ket base militar ti Filipinas, ket agtalinaed a kukua, imatonan, ken iwardas ti Armed Forces of the Philippines (AFP) dagitoy.
Daytoy ti inlawlawag ti National Security Council (NSC) bayat ti panangideklarar ti Iran a rautenda dagiti base militar ti Estados Unidos (US) kalpasan ti pananggubat ti Israel ken US iti Iran, a nangpataud iti danag kadagiti dadduma a sektor, nangruna ta nasinged a kadua ti Filipinas ti US ken ti kaadda ti Enhanced Defense Cooperation Agreement (EDCA) site iti pagilian.
Kuna ti NSC a makium-umanda iti AFP, Department of National Defense (DND), ken dadduma pay a maseknan nga ahensia tapno monitorenda dagiti pasamak iti Middle East.
Segun iti NSC, agtalinaed iti Middle East ti panaggugubat, ken awan napatalgedan a direkta a pangta iti Filipinas, agraman dagiti pasilidad ti militar ti pagilian.
Pinakdaaran ti NSC ti publiko nga agannad ken agridam kadagiti maiwaras a palso nga impormasion, kalpasan a nagwaras ti sayangguseng iti social media nga agkunkuna a mabalin nga isaruno a rauten ti Iran dagiti EDCA site iti Filipinas kalpasan a rinaut ti Iran dagiti pasilidad ti US iti Middle East.
Apidabit ti tunggal maysa iti 18 nga ex-marines, kiniddaw ti Ombudsman
Iti agdama, adda siam nga EDCA site iti pagilian: Antonio Bautista Air Base (Palawan), Basa Air Base (Pampanga), Benito Ebuen Air Base (Cebu), Fort Magsaysay (Nueva Ecija), Lumbia Airport (Cagayan de Oro), Balabac Island (Palawan), Camp Melchor Dela Cruz (Gamu, Isabela), Lal-lo Airport (Lal-lo, Cagayan), ken Naval Base Camilo Osias (Santa Ana, Cagayan).
Maibasar iti tulag ti EDCA, mapalubosan dagiti puersa ti US a mapan kadagiti lugar iti uneg ti kampo militar ti Filipinas para iti sangsangkamaysa a panagsanay, panangisagana iti alikamen, panangipaay iti tulong ken panagresponde iti didigra, idinto nga agtalinaed a kukua ken tengngel latta ti Filipinas dagitoy. (Argyll Cyrus Geducos/Manila Bulletin//Lito Hilidon/Bannawag)
