Nagkiddaw iti kinapribado ti pamilia ni Mary Ann de Vera, ti overseas Filipino worker (OFW) a nairaman a natay iti panangbomba ti Iran iti Tel Aviv, Israel, kabayatan ti panagladingitda, kasta met ti nadaras a pannakaisubli ti bangkay daytoy iti pagilian, segun kadagiti lokal nga opisial ti Basista, Pangasinan idi Marso 2.
Kuna ni Basista Mayor Jolly Resuello Jr. a kiniddaw ti pamilia kadagiti maseknan nga ahensia a pardasanda koma ti pannakaiproseso dagiti dokumento tapno mayawiden ti bangkay ni Mary Ann.
Segun ken ni Resuello, simmarungkar dagiti kameng ti Overseas Workers Welfare Administration (OWWA) ken ti Department of Migrant Workers (DMW) idi Domingo (Marso 1) tapno mangted iti impormasion ken tulong.
Mangted met iti pinansial a tulong ti gobierno lokal ken probinsial.
Addan dagiti polis ken kameng ti barangay peacekeeping tapno masigurado ti kinapribado ti pamilia.
Apidabit ti tunggal maysa iti 18 nga ex-marines, kiniddaw ti Ombudsman
Kiniddaw ni Resuello kadagiti vlogger ken kameng ti media nga ikkanda koma ti panawen ti pamilia ni Mary Ann nga agladingit a pribado ken liklikanda ti mapan iti balayda wenno mangiwaras iti personal nga impormasion kas iti detalye ti pasaporte ni Mary Ann. (Liezle Basa Iñigo and Philippine News Agency/Manila Bulletin//Lito Hilidon/Bannawag)
