Dinipensaan ni Senate President Pro Tempore Panfilo Lacson ti bagina kadagiti kritiko a mangbabbabalaw kenkuana gapu iti saanna a panangiwayat iti imbestigasion ti Senado mainaig kadagiti 18 a dati a kameng ti militar mainaig iti naanomalia a flood control project, di la ket ta agbalin laeng a pagaangawan daytoy.
Dakdakamaten ni Lacson dagiti 18 nga ex-Marines a nagpabigbig a binaon ni dati a kongresman Zaldy Co a mangitulod iti ₱805 a bilion a kuarta a kickback dagiti sumagmamano a politiko manipud kadagiti flood control project, gapu ta saan a nakapapati ti testimoniada.
Ni Lacson ti daulo ti Senate Blue Ribbon Committee a mangim-imbestigar iti anomalia ti flood control projects.
"No palubosantayo nga agparang dagiti 18, amangan no agbalin a kasla sirkus ti imbestigasion. Kasla awisentayo dagiti tao a makilugan, nangruna no ikkantayo ida iti gundaway a mangiwaras iti istoriada nga ammotayo met a saan nga agtutunos, ken saan a nakappapati ti ibagbagada. Apay nga ikkantayo ti lugar dagita?" kinuna ni Lacson iti maysa nga interbiu idi Marso 2.
Segun ken ni Lacson, no agpayso amin a detalye nga imbagbaga dagiti 18 a dati a militar, ti kunkunada a panangitulodda iti kuarta ket saan pay a malpas agingga 2028.
Apidabit ti tunggal maysa iti 18 nga ex-marines, kiniddaw ti Ombudsman
Kinuestionar ni Lacson no adda access ni Co iti sibubukel a ₱805 a bilion idinto nga adda pay dadduma a personalidad nga inaklonda a nakaalada iti kickback manipud kadagiti ghost project.
Maysa pay a kitkitaen ni Lacson ket no ania ti makagapu a dishonorably discharged dagiti ex-Marines, idinto nga adda due process iti panangipakat iti daytoy -- no ania a kita ti kaso ti nakaikkatanda -- tapno matingiting ti kredibilidad dagitoy.
Innayon ni Lacson a masapul a sukimaten ti naggapuan ti impormasion, kasta met ti kinapudno ti impormasion.
"No agparparang a palso ken imposible a maaramid ti testimonia dagiti 18 nga ex-Marines, saan kadi a ti panangangay iti hearing ket mangpatalged ken mangpadayaw iti palso nga impormasion?" kinuna ni Lacson iti sesion ti Senado. (Hannah L. Torregoza/Manila Bulletin//Lito Hilidon/Bannawag)
