Binukel dagiti dadakkel a pagiwarnak iti pagilian ken ti Presidential Communications Office (PCO) ti memorandum of understanding (MOU) ita nga aldaw, Marso 4, a mangparmek iti palso a damag ken palso nga impormasion iti digital platform.
Maysa ti Manila Bulletin kadagiti kangrunaan a pagiwarnak a nagpirma iti MOU a panggepna ti panangsalimetmet iti inegtridad ti damag ken impormasion ken masalakniban ti publiko manipu iti palso a damag (fake news), ken palso nga impormasion iti internet ken social media.
Segun ken ni PCO Secretary Dave Gomez, nagwarasen ti palso a damag aglalo iti social media, ket adun ti mamati ken maallilaw, isu a masapul nga agpatinggan daytoy.
Kinuna ni Gomez nga agpannuray ti demokrasia iti siaammo a publiko -- saan nga iti di umiso ti pannakaammoda, saan nga iti natawtaw, ken saan nga iti naallilaw.
Maibasar iti MOU, maipasdek dagiti alagaden iti panagtinnulong ti PCO ken dagiti kangrunaan a pagiwarnak iti Filipinas -- kas iti Manila Bulletin, Philippine Daily Inquirer, The Manila Times, The Philippine Star, Business Mirror, Business World, Daily Tribune, Malaya Business Insight, ken Manila Standard — tapno masalakniban ti publiko iti saan a nasayaat nga epekto ti palso a damag, a napasingkedan ti pannakasalaknib dagiti nalaka a maapektaran a tattao iti panawen ti krisis, emerhensia, wenno didigra.
Apidabit ti tunggal maysa iti 18 nga ex-marines, kiniddaw ti Ombudsman
Inkari dagiti nagpirma a luktanda dagiti wagas a mangpatalged kadagiti maipaskil iti social media, nga ipakatda ti panagannad tapno malapdan ti panagwaras iti pinartuat a content.
Impanamnama dagiti pagiwarnak a pagtalinaedenda ti umisu, napatalgedan, ken responsable a panangipadamag idinto a maraem latta ti wayawaya ti prensa ken panagwaywayas ti panangipablaak.
Pinasingkedan ni Manila Bulletin Publisher ken dati a press secretary Herminio Coloma, a nangibagi iti Manila Bulletin, ti akem ti kompania a kas maysa a mapagtalkan a plataporma kadagiti napatalgedan a damag ken mamagtalged a panagsasarita.
Impaganetget ni Coloma a ti pannakitinnulong iti gobierno ket dina kaipapanan ti panangilaksid iti agturturay kadagiti panangtingiting, ngem maipasigurado ketdi nga agbatay iti kinapudno ken kinasirib dagiti diskurso. (Betheena Unite/Manila Bulletin//Lito Hilidon/Bannawag)
