Ni Mojtaba Khamenei, anak ti pimmusay a kangatuan a daulo ti Iran a ni Ayatollah Ali Khamenei, ti maibilang a maysa kadagiti mabalin a sumukat iti amana -- sakbay pay ti ipapatay daytoy ken iti laksid ti kaawan padasna ng agakem iti gobierno.
Maysa a nailemmeng a personalidad iti Islamic Republic, saan pay a nakita ti publiko ni Mojtaba Khamenei sipud idi Sabado a pannakatay ti amana.
Mapapati a sibibiag pay ni Mojtaba Khamenei ken aglemlemmeng daytoy bayat ti panangraut ti Estados Unidos ken Israel iti Iran, ngem saan pay nga inreport ti media ti gobierno ti Iran no sadino ti yan daytoy.
Nalatak ti nagan ni Mojtaba Khamenei a kas maysa kadagiti mabalin a sumukat iti amana, banag a nababalaw iti kallabes a kas mabalin a mangpataud iti teokratiko a bersion ti dati a natawid a monarkia ti Iran.
Ngem gapu iti pannakatay ti amana, a maibilang itan a martir iti gubat a maibusor iti Estados Unidos ken Israel, mabalin nga aglatak pay ni Mojtaba Khamenei kadagiti lallakayen a 88 a kameng ti Assembly of Experts a mangpili iti sumaruno a kangatuan a daulo ti Iran.
Dati a sekretario ti DILG Sarmiento, nadutokan a baro nga adviser ti OPAPRU
Asino man ti agbalin a daulo ket iturayanna ti militar ti Iran a makigubgubat ita, ken ti suplay ti nabaknang nga uranium a mausar a pangaramid iti nuklear nga armas -- no kayatna nga ideklarar. (Associated Press/Manila Bulletin//Lito Hilidon/Bannawag)
