Sinupiat ti Embahada ti China iti Filipinas ti nakompirmar a report ti National Security Council (NSC) a pannakaarestar ti sumagmamano a Filipino a maipagarup nga addaan pakainaigan iti panagespia ti China ken dakes a panangimpluensia daytoy iti pagilian.
"Supiaten ken ladingitenmi dagiti iresponsable a sasao dagiti sumagmamano nga ahensia ti Filipinas a mangiwarwaras iti makunkuna a 'Chinese spy' a sarsarita," kinuna ni panakangiwat ti Embahada ti China Ji Lingpeng idi Marso 5.
Dinakamat ni Ji ti kaudian a waragawag ti NSC a nangkompirmar iti report ti Rappler a natakuatan dagiti autoridad ti nakaro a parikut iti seguridad a pakairamanan ti panagespia ken dakes a panangimpluensia iti pagilian nga adda pakainaigan ti China.
Iti baet ti maulit-ulit nga alegasion ti panagespia a maibusor iti China, impaganetget ti embahada nga umannurotda iti prinsipio a saan a makibiang iti bukod a parikut ti dadduma a pagilian. (Joseph Pedrajas/Manila Bulletin//Lito Hilidon/Bannawag)
