Inwaragawag ti Department of Justice (DOJ) idi Marso 5 pinaingetdan ti pannakausig dagiti kaso ti panagkunniber iti pagilian.
Iti umuna a pannakaangay ti Anti-Corruption Workshop and Summit, kinuna ni DOJ Acting Secretary Frederick A. Vida nga agpatpatulongda iti Office of the Ombudsman ken iti National Bureau of Investigation (NBI) tapno maan-anay ti pannakabukel iti kaso, mapasayaat ti pannakataming dagiti ebidensia, ken mapadaras dagiti dadakkel a kaso ti panagkunniber.
Maysa daytoy kadagiti lima a kangrunaan a prioridad ti DOJ iti komprehensibo a wagas iti panangparmek iti panagkunniber.
Isayangkat ti DOJ ti pannakapasayaat iti kabaelan dagiti taoda kas iti panagsanay dagiti prosecutor iti financial forensics, cyber investigations, ken complex fraud detection.
Dimmar-ay iti taripnong dagiti ahensia a paset ti DOJ kas iti Bureau of Immigration (BI), Bureau of Corrections, NBI, Parole and Probation Administration, Public Attorney’s Office (PAO), Land Registration Authority (LRA), Office for Alternative Dispute Resolution, Office of the Government Corporate Counsel, Office of the State Counsel, ken ti National Prosecution Service. (Jeffrey Damicog/Manila Bulletin//Lito Hilidon/Bannawag)
