Ekspektaren ti nakarkaro a panaggaraw dagiti troll ken fake news farm iti social media apaman a marugian ti pannakabista dagiti impeachment complaint a maibusor ken ni Bise Presidente Sara Duterte.
Daytoy ti impakdaar ni Lanao del Sur 1st district of Rep. Zia Alonto Adiong idi Marso 5 iti panangballaagna iti publiko nga agridam iti inggagara a panangallilaw dagiti troll.
Addan iti maikatlo a paset ti proseso ti impeachment kontra ken ni Duterte kalpasan a maawatna ti pakaammo manipud iti Kamara a mangipaay kenkuana iti gundaway a mangsungbat kadagiti alegasion a nadakamat iti dua nga impeachment complaint.
Kalpasan dayta, isayangkat ti Committee on Justice ti panangbista tapno kitaenda no adda probable cause iti kaso nga impeachment ni Duterte.
Segun ken ni Adiong, ekpektarenna ti yaadu ti mangiwaras iti palso nga impormasion a mangallilaw iti publiko maianig iti proseso ti impeachment, ket binalakadanna ti publiko nga agbalin a managsukisok, managpanunot, ken agannad kadagiti makitkita iti online ta kaaduan kadagitoy ti saan a pudno. (Ellson Quismorio/Manila Bulletin//Lito Hilidon/Bannawag)
