Dinagadag ni Senador Francis Escudero idi Marso 8 dagiti pribado a kompania a surotenda met koma ti impatungpal ti Malakanyang nga uppat nga aldaw tunggal lawas a panagtrabaho wenno ti nayababa nga oras ti panagtrabaho tapno maep-ep ti epekto ti ingingina ti lana.
Insingasing daytoy ni Escudero kasanguanan ti panagsagrap ti pagilian iti nasaknap nga epekto ti gubat iti Middle East iti ekonomia.
Segun ken ni Escudero, makatulong ti pannakabaliw ti oras ti panagtrabaho iti pannakakissay iti panagbiahe, mangipababa iti magasto iti operasion, mangipaay iti nayon a bang-ar kadagiti mangmangged kabayatan ti panaggaraw ti presio ti lana iti sangalubongan a merkado, ken mangkissay iti bilion a pisos a pukaw ti gobierno iti inaldaw gapu iti nadagsen a trapiko.
Iti biang ti Kongreso, impatungpaldan ti uppat nga aldaw a panagtrabaho iti makalawas kadagiti empleadoda.
Innayon ni Escudero a ti pannakipaset ti pribado a sektor ket mangpasaknap iti impatungpal ti gobierno a temporario a pannakakissay iti oras ti trabaho, nangruna kadagiti dadakkel a distrito ti negosio. (Hannah L. Torregoza/Manila Bulletin//Lito Hilidon/Bannawag)
