Dinagadag ni Senate President Pro Tempore Panfilo “Ping” Lacson ti publiko nga ireportda kadagiti autoridad dagiti paggasolinaan a nangipangaton iti presio ti gasolina, sakbay pay ti naikeddeng nga aldaw a pannakaipangato dagiti presio ti lana.
Imballaag ni Lacson a dagiti kompania a nasapa nga agingato iti lakoda a gasolina ket aglabsing iti Republic Act No. 8479 wenno ti Downstream Oil Industry Deregulation Act of 1998 ken ti RA No. 7394 wenno ti Consumer Act of the Philippines.
Segun ken ni Lacson, mabalin nga ireport dagitoy a kompania iti Philippine National Police (PNP) ken local government units (LGU), idinto a binilinen ti Department of Energy (DOE) dagiti autoridad iti posible a panaglabsing dagiti sumagmamano a kompania iti paglintegan.
Imbalakad ni Lacson a ti panagridam ti publiko ken nadaras a pannakaireport kadagiti makita nga iregularidad ti makatulong iti publiko a mangipatungpal iti linteg ken mangsalaknib iti publiko iti abusado a panangingato iti presio.
Ita nga aldaw, Marso 9, ti naikeddeng a pannakayanunsio ti pinal a pannakaingato ti presio ti lana. (Hannah L. Torregoza/Manila Bulletin//Lito Hilidon/Bannawag)
