Nakasaganan nga agsubli iti pagilian ti sumagmamano a Filipino manipud iti Middle East, babaen ti chartered flight iti sumarsaruno nga al-aldaw, segun iti Malakanyang.
Segun ken ni Undersecretary ti Presidential Communications Office (PCO) Claire Castro, nakasaganan dagiti chartered flight a mangyawid kadagiti Filipino manipud Saudi Arabia ken United Arab Emirates (UAE), a ti kasapaan a biahe ket pumanaw inton Marso 14.
Innayon ni Castro a maponduan daytoy a biahe babaen ti Emergency Repatriation Fund nga imatonan ti OWWA.
Iti UAE, nangala ti gobierno iti commercial flight ti Emirates Airlines para kadagiti OFW ken dagiti dependent-da manipud iti Dubai.
Kuna ni Castro a 16 nga OFW ti bimmallasiw iti nagbedngan ti Egypt ken lumabasda iti Cairo ken agturong iti Muscat, Oman sa agbiahe iti Manila inton Marso 11.
Dati a sekretario ti DILG Sarmiento, nadutokan a baro nga adviser ti OPAPRU
Adda pay 20 nga OFW manipud iti Dubai a nagbiahe iti Muscat, ket manipud sadiay, agluganda iti eroplano nga agpa-Manila inton Marso 10.
Nasuroken a 400 a Filipino ti nakaawiden sipud idi nangrugi ti gubat iti Middle East. (Betheena Unite/Manila Bulletin//Lito Hilidon/Bannawag)
