Imbilin ni Presidente Marcos Jr. ti nadaras a pannakaiwaras ti P5,000 a fuel subsidy para kadagiti drayber ti public utility vehicle (PUV) nga apektaran ti ingingina ti presio ti lana maigapu iti gubat iti Middle East.
Segun ken ni Executive Secretary Ralph Recto, mangrugida a mangiwaras iti tulong pinansial tapno maep-ep ti parikut dagiti drayber ti jeepney ken traysikel.
Tapno mapadaras ti pannakaipatungpal dagitoy, kinasarita ni Recto dagiti mayor iti Metro Manila idi Marso 11 tapno makikoordinar iti pannakaiwaras daytoy.
Mangrugi iti Metro Manila ti pannakaiwaras dagiti ayuda inton umay a lawas, nga idauluan ti Department of Social Welfare and Development (DSWD) ken ti Department of Transportation (DOTr).
Kalpasan iti Kamanilaan, maisaknap ti programa iti dadduma a rehion iti entero a pagilian.
Dati a sekretario ti DILG Sarmiento, nadutokan a baro nga adviser ti OPAPRU
Paset daytoy ti pammilin ni Marcos tapno matulongan ken salaknibanda ti pagbiagan dagiti sektor a direkta nga apektaran ti panagngato ti presio ti lana.
Itay kallabes, kinuna ni Marcos nga ideklararna kas "urgent" ti singasing a pannakaipaay kenkuana iti emergency powers tapno makaresponde a nadaras ti gobierno iti panagngato ti presio ti lana iti sangalubongan a merkado a pinataud ti riribuk iti Middle East.
Innayon ni Marcos nga agsasapulda iti dadduma pay a mabalin a mangsuplay iti lana tapno masigurado a natalged ti suplay a lana iti baet ti saan a natalged a sangalubongan a merkado. (Argyll Cyrus Geducos/Manila Bulletin//Lito Hilidon/Bannawag)
