Saan nga inanamongan ti 6th division ti Sandiganbayan idi Marso 10 dagiti petision ti walo a kakadua ni dati a kongresman Zaldy Co a naidarum iti malversation of public funds mainaig iti naanomalia a flood control project iti Naujan, Oriental Mindoro.
Saan a pinatgan ti korte ti kiddaw a makapiansa da Department of Public Works and Highways (DPWH)-Region IV-B Regional Director Gerald A. Pacanan, Assistant Regional Director Gene Ryan A. Altea, Assistant Regional Director Ruben D. Santos Jr., Construction Division Chief Dominic G. Serrano, Design Division officer-in-charge Montrexis Tamayo, Hydrology Division Chief Dennis Pelo Abagon, Maintenance Division Head Juliet Calvo, ken Project Engineer III Felisardo S. Casuno.
Naidarumda iti panaglabsing iti Article 217 mainaig iti Article 171(4) ti Revised Penal Code iti malversation of public funds babaen ti palsipikado a dokumento. Awan ti inrekomendar ti prosekusion a piansa.
Naidarumda pay iti kaso a graft mainaig met laeng iti nadakamat a flood control project.
Segun kadagiti nagpetision, saan a napigsa dagiti ebidensia a maibusor kadakuada, idinto a naibasar laeng dagitoy kadagiti pattapatta, ken impaganetgetda a maspaul a paneknekan ti prosekusion ti ebidensiada iti maysa a hearing.
Dati a sekretario ti DILG Sarmiento, nadutokan a baro nga adviser ti OPAPRU
Dimmawat met da Serrano ken Calvo iti kaasi ti korte idinto a senior citizen-da a duan. Nagkiddaw met ni Altea a makapagpiansa tapno mataripatona ti asawana nga agsagsagaba iti kanser.
Ngem inkeddeng ti Sandiganbayan a saan a maikari dagiti akusado nga agpiansa, ket inlawlawagna a saanna kaipapanan a nasentensiaan idan a nakabasol, idinto a kinita laeng ti korte ti kadagsen ti ebidensia para iti panagpiansa.
Innayon ti korte a ti ebidensia ti prosekusion a ti nagtitipon nga aramid dagiti akusado ket nangitunda iti isu met laeng a panggep -- tapno mairuar ti pondo ti DPWH iti SunWest, Inc. nupay saanda a natungpal dagiti kasapulan nga espesipikasion. (Czarina Nicole Ong Ki/Manila Bulletin//Lito Hilidon/Bannawag)
