Siam a Filipino ti natalged a nakasubli iti Filipinas kalpasan ti naballigi a panagbakuitda manipud iti Iran, segun iti report ti Department of Foreign Affairs (DFA) ita nga aldaw, Marso 11.
Daytoy ti umuna a bunggoy dagiti Filipino a nagawid manipud iti Iran sipud idi rinugian ti Israel ken Estados Unidos ti operasion ti militar a maibusor iti Tehran idi Pebrero 28.
Naipanaw dagiti Filipino sadiay manipud idi Marso 10 agingga 11 babaen ti panagtitinnulong dagiti Embahada ti Filipinas iti Iran ken Turkey, a nangpapardas iti panagballasiwda iti daga ken panagbiaheda iti Filipinas, iti baet ti nainget a seguridad iti rehion.
Segun ken ni DFA Undersecretary for Migration Affairs Ezzedin Tago, mapanen a 327 ti naawatda a repatriation request manipud iti Middle East idi Marso, siam kadagitoy ti naggapu iti Iran.
Innayon ti DFA nga adda 800 a Filipino nga agindeg iti Iran, a kaaduan kadakuada ket assawa dagiti umili iti Iran. (Joyce Ann L. Rocamora/PNA//Lito Hilidon/Bannawag)
