Agarup 139,000 a drayber ti traysikel iti Metro Manila ti maikkan iti ₱5,000 a cash subsidy manipud iti gobierno tapno maep-ep ti epekto ti ingingina ti lana, segun iti Department of Social Welfare and Development (DSWD) ita nga aldaw, Marso 12.
Kuna ni DSWD Secretary Rex Gatchalian a mangrugi ti pannakaiwaras iti cash subsidy inton Marso 17 kadagiti 39 a nadutokan a payout center iti Metro Manila.
Immuna a naikkan dagiti drayber ti traysikel ta immuna a napatalgedan dagiti listaanda ken nakikoordinar kadagiti local government units (LGU).
Agpaut iti tallo nga aldaw ti payout tapno masigurado a makapasada latta dagiti drayber bayat ti panagalada iti ayuda. Dagiti LGU ti mangikeddeng iti iskediul ti panangala dagiti drayber, tapno maliklikan ti atiddog a pila.
Segun ken ni Gatchalian, makaawat met dagiti dadduma pay a drayber ti para iti publiko a transportasion, kas iti jeepney ken bus, iti ₱5,000 nga ayuda apaman a mapatalgedan ti Land Transportation Franchising and Regulatory Board dagiti listaan ti benepisiario.
Dati a sekretario ti DILG Sarmiento, nadutokan a baro nga adviser ti OPAPRU
Impasigurado ni Gatchalian iti publiko nga adda umdas a pondo daytoy a programa iti sidong ti Assistance to Individuals in Crisis Situation (AICS) program, nga addan nailatang a P30 a bilion para iti umuna a pannakaiwaras dagiti ayuda manipud iti ₱60 a milion a pondo ti DSWD. (Ellalyn De Vera-Ruiz/Manila Bulletin//Lito Hilidon/Bannawag)
