Dagiti di agressat a panangraut ti Iran kadagiti agdaldaliasat a barko, ken iti impraestruktura a para iti enerhia, ti nangitunda iti ingingina ti presio ti lana a nagbalinen a $100 kada bariles ita nga aldaw, Marso 12, idinto a ti agtultuloy a panangraut ti Estados Unidos ken ti Israel iti Iran ti pagilasinan a saan pay nga agpatingga ti gubat.
Pinuntiria ti Iran ti maysa a container ship iti baybay ti Dubai, nangpataud iti uram iti asideg ti eropuerto ti Bahrain, nangpuntiria iti dakkel nga oil field iti Saudi Arabia babaen ti drone, ken nangpuersa iti Iraq a mangisardeng iti operasionda kadagiti amin nga oil terminal ti pagilian babaen ti panangrautda iti port of Basra iti Persian Gulf.
Malaksid iti panangrautda kadagit impraestruktura, binangenan ti Iran ti Strait of Hormuz, a pagpagnaan dagiti amin a bapor manipud iti Persian Gulf nga agturong iti Indian Ocean a pagdaldalanan dagiti mangibibiahe iti lana iti sangalubongan.
Iti sabali a bangir, inanamongan ti United Nations Security Council (UNSC) ti resolusion a mangpaspasardeng iti Iran iti panangrautna kadagiti kabangibangna a pagilian, ngem kasla saan nga inkankano ti Iran daytoy. (The Associated Press/Manila Bulletin//Lito Hilidon/Bannawag)
