Gutgutugoten ni Akbayan Party-list Rep. Chel Diokno ti Committee on Justice ti Kamara nga alaenda iti sidongda ti nakaditener a testigo a ni Ramil Madriaga tapno masigurado ti kinatalgedna kasta met ti idadar-ayna iti panagtulid ti kaso nga impeachment kontra ken ni Bise Presidente Sara Duterte.
Daytoy ti kiniddaw ni Diokno iti suratna ken ni daulo ti Committee on Justice Chairperson Batangas 2nd district Rep. Gerville Luistro idi Marso 5, apaman a naideklarar a “sufficient in form and substance" dagiti dua nga impeachment complaint.
Nakaditener ita ni Madriaga, a maipagarup a dati nga intelligence officer ti administrasion ni Duterte, iti Camp Bagong Diwa iti Bicutan, Taguig City.
Maibilang a baro nga ebidensia kontra ken ni Duterte ti testimonia ni Madriaga, a maysa kadagiti nadakamat iti immuna a kaso nga impeachment idi maika-19 a Kongreso.
Iti isu met laeng a surat, kiniddaw ni Diokno iti komite nga ipaaladan dagiti kangrunaan a dokumento a kasapulan tapno matingitingda no adda umdas a pagbatayan ti kaso nga impeachment, kas iti kopia ti Statements of Assets, Liabilities and Net worth (SALN) ni Duterte para iti tawen 2022 agingga 2025, 2007 agingga 2013, ken 2016 agingga 2022.
Dati a sekretario ti DILG Sarmiento, nadutokan a baro nga adviser ti OPAPRU
Kiniddaw met ni Diokno iti Anti-Money Laundering Council (AMLC) a mangisubmitir iti nasapataan a sertipikasion no adda rekordda a mainaig ken ni Duterte, tapno makita ti komite no adda nagun-od ni Duterte a di mailawlawag a panagbaknang ken saanna a pannakaideklarar iti SALN daytoy.
Manamnama a tamingen ti komite dagitoy a kiddaw inton umay a lawas kas panagsaganada iti panangiparang kadagiti ebidensia, a paset ti proseso ti impeachment. (Ellson Quismorio/Manila Bulletin//Lito Hilidon/Bannawag)
