Agsadag ti Kamara iti inkari ti grupo a para iti tranportasion a saanda nga agkiddaw a maipangato ti plete no la ketdi nadaras a mangipaay iti tulong ti gobierno kas iti pannakasuspenso wenno pannakakissay ti excise taxe iti lana.
Daytoy ti inkumit dagiti opisial ti grupo a Mananakay at Nagkakaisang Terminal ng Transportation (Manibela) ken Liga ng Transportasyon at Operators (LTOP) iti naangay a hearing ti Committee on Transportation idi Marso 11.
Induluan ni Quezon City 3rd Rep. Franz Pumaren ti komite a nangtaming iti fuel subsidy program nga isayangkat ti gobierno para iti sektor ti transportasion ken libre a panaglugan para kadagiti pasahero.
Iti nasao a hearing, sinaludsod ni Kamanggagawa Party-list Rep. Elijah “Eli” San Fernando iti grupo ti transportasion no adda panggepda a kiddawen ti pannakaipangato iti plete.
Insungbat ni Mar Valbuena, founder ken presidente ti Manibela, maudi a pamuspusanda ti pannakaipangato iti plete.
Dati a sekretario ti DILG Sarmiento, nadutokan a baro nga adviser ti OPAPRU
Kinuna ni Valbuena a no mabalin, nadaras koma ti pannakasuspenso ti excise tax ti lana wenno makissayan ti value added tax (VAT) tapno adda latta maganansiar dagiti drayber.
Segun ken ni Valbuena, mapan laengen a ₱800 agingga iti agarup ₱400 ti inaldaw a masapulanda sipud idi ngimmina ti krudo.
Manamnama a ngumina pay ti presio ti gasolina ken krudo manipud iti ₱17 agingga ₱24 kada litro iti ngudo ti lawas.
Inlawlawag ni Valbuena a nababa ti ₱2 a ngumatuan ti plete no bilang kiddawenda daytoy iti Land Transportation Franchising and Regulatory Board (LTFRB).
Itay kallabes, naanamongan iti Kamara iti maikadua a pannakaibasa ti House Bill (HB) No. 8418, a napauluan ti, "Act authorizing the President to suspend or reduce excise taxes on petroleum products during national or global economic emergencies, amending for the purpose the National Internal Revenue Code of 1997, as amended."
Nupay napardas ti pannakaanamong daytoy iti Kamara, saanda a maaprobaran daytoy iti maikatlo ken pinal a pannakaibasa ta awan pay ti abiso manipud iti Malakanyang a nasertipikaran a kas urgent daytoy a gakat, ngem mabalin pay a maanamongan daytoy apaman nga agsubli ti sesion ti Kamara inton umay a lawas. (Ellson Quismorio/Manila Bulletin//Lito Hilidon/Bannawag)
