Saan a nababbaba iti 24 a Filipino ti nakasublin iti pagilian babaen ti eroplano ti militar ti Singapore a naibaon iti Saudi Arabia gapu iti pannakasinga dagiti biahe ti eroplano a gapuanan ti gubat iti Middle East.
Segun ken ni Embahador ti Singapore iti Manila Constance See ita nga aldaw, Marso 13, imbaon ti Singapore ti eroplanoda a RSAF A330 Multi-Role Tanker Transport a mangyawid kadagiti Singaporean.
Nakikoordinar ti Department of Foreign Affairs (DFA) iti gobierno ti Singapore, babaen ti Philippine Consulate General iti Jeddah, a nangtaming iti panagbiaheda.
Dua a dosena a Filipino ken dadduma pay nga umili ti Brunei, Indonesia, Australia, Sri Lanka, ken Vietnam ti nakilugan iti eroplano.
"Daytoy ti panagkaykaysa ti ASEAN, agtitinnulong dagiti agkakaarruba a pagilian iti tiempo ti rigat. Dagiti kaarrubami iti ASEAN ket timmulong a mangyawid kadagiti Singaporean iti napalpalabas a krisis," kinuna ni See.
Dati a sekretario ti DILG Sarmiento, nadutokan a baro nga adviser ti OPAPRU
Inyebkas ti Philippine Consulate General ti panagyamanda iti Singapore Consulate General a panangtulongda kadagiti Filipino a makaawid.
Iti sabali a bangir, pinadaras ti Migrant Workers Office (MWO) ken ti Overseas Workers Welfare Administration (OWWA) iti Jeddah ti panangi-book iti eroplano a pagluganan dagiti overseas Filipino worker (OFWs) nga agpa-Manila, a naikkan iti tulong pinansial. (Joseph Pedrajas/Manila Bulletin//Lito Hilidon/Bannawag)
