Impalgak ti Pulse Asia ita a Biernes, Marso 13, ti resulta ti surbey nga insayangkatda iti entero a pagilian, nga anamongan ti kaaduan dagiti Filipino ti pannakaipasa ti linteg a mangiparit iti political dynasty.
Segun iti 1st Quarter 2026 “Ulat ng Bayan” survey a naisayangkat manipud Pebrero 27 agingga Marso 2, 64 a porsiento dagiti nataengan a Filipino ti umanamong iti pannakaipaulog ti linteg a mangiparit kadagiti political dynasty iti tay-ak ti politika iti Filipinas.
Adda met 17 a porsiento dagiti respondent a saan nga umanamong iti singasing nga anti-political dynasty law.
Natakuatan ti Pulse Asia a kaaduan kadagiti nangsuporta iti anti-political dynasty law dagiti adda iti nadumaduma a lugar kas iti Metro Manila (69 a porsiento), ti dadduma a paset ti Luzon (74 a porsiento), ken iti Visayas (73 a porsiento).
Nagudua met ti kapanunotan dagiti respondent iti Mindanao, ta 32 a porsiento ti umanamong, idinto a 39 a porsiento ti saan nga umanamong iti anti-political dynasty law, ket 29 a porsiento ti nagkuna nga undecided.
Dati a sekretario ti DILG Sarmiento, nadutokan a baro nga adviser ti OPAPRU
Mapan a 69 a porsiento dagiti respondent ti nagkuna a rumbeng a maparitan dagiti agkakabagian nga agsaruno a mangakem iti agpada a pagsaadan iti gobierno.
Iti sabali a bangir, 72 a porsiento dagiti respondent ti nagkuna a masapul a maiparit ti panaggiddan a panagakem dagiti agkakabagian iti nailian a pagsaadan, idinto a 20 a porsiento ti undecided, ken 8 a porsiento ti saan nga umanamong.
Naisayangkat ti surbey babaen ti rupanrupa a pananginterbiu iti 1,200 a nataengan nga agtawen iti 18 agpangato. (Ellalyn De Vera-Ruiz/Manila Bulletin//Lito Hilidon/Bannawag)
