Saan nga inanamongan ti Sandiganbayan ti mosion ni Senador Jose “Jinggoy” Estrada a mangala iti kopia ti preliminary investigation record ti kasona a graft ken da dati a senador Ramon "Bong" Revilla Jr. ken Juan Ponce Enrile.
Iti resolusion ti fifth division ti Sandiganbayan idi Marso 12, kunada a saan a nakaipaay ni Estrada iti nainkalintegan a rason tapno ibilinda ti pannakairuar ti dawdawatenna a kopia ti rekord ti Office of the Ombudsman, ken saanna met a naibaga no ania a partikular a dokumento ti mairuar, ken saanna a nailawlawag no apay a kasapulanna dagitoy a dokumento iti kasona.
Idi Enero 7, 2026, nangipila ni Estrada iti mosion nga agkidkiddaw iti "kompleto" a rekord ken inlawlawagna a kasapulan a makitana dagiti napalabas nga statement dagiti kaduana a naidarum ken dagiti testigoda, no adda, a nailanad iti rekord ti preliminary investigation.
Ngem saan a pinatgan ti Sandiganbayan daytoy idi Enero 27, 2026.
Nagipila ni Estrada iti motion for reconsideration idi Pebrero 16, ket kinunana nga umdasen ti imbagana a makagapu iti panagkiddawna iti rekord, a tapno mangtingiting kadagiti testigo.
Dati a sekretario ti DILG Sarmiento, nadutokan a baro nga adviser ti OPAPRU
Ngem inkeddeng ti korte nga awan ti merito ti motion for reconsideration ni Estrada, idinto nga inulitda laeng ti argumentoda a tinaming ken rinisuten ti korte, isu a saanen a kasapulan a pagsasaritaan daytoy nga isyu.
Insurat ni Associate Justice Maryann E. Corpus-Manalc ti resolusion ti Sandiganbayan, nga inanamongan da Fifth Division Chairperson Associate Justice Zaldy V. Trespeses ken Associate Justice Gener M. Gito.
Naidarum ni Estrada iti 11 a kaso ti maipagarup a panaglabsing iti Section 3(e) of Republic Act No. 3019, the Anti-Graft and Corrupt Practices Act, gapu iti maipagarup a panangibolsana iti ₱183,793,750 manipud iti priority development assistance fund (PDAF) idi babaen ti panagnyendorsona iti palso a non-government organizations (NGO) a kukua ni Janet Lim Napoles idi 2004. (Czarina Nicole Ong Ki/Manila Bulletin//Lito Hilidon/Bannawag)
