Gutgutugoten ti Petroleum Association of the Philippines (PAP) dagiti kompania ti enerhia nga ipangrunada koma nga usaren ti natural a gas a parnuay ti Filipinas tapno agbalin a natalged ti presio ti koriente, idinto a ti saan pay a nausar a kapasidad ti pagilian ti kasayaatan a pangsalaknib iti saan a natalged a panagangkat iti lana iti sangalubongan.
Iti maysa nga statement, kinuna ni PAP Co-chairperson Donnabel Kuizon Cruz a ti sibubukel a pannakaipatungpal ti panagusar iti natural gas a parnuay ti pagilian ket kasapulan tapno lumaka ti presio ti enerhia.
Impaganetget ni Cruz, nga agpapaay a chief executive officer ti Prime Energy a mangpatpataray iti Malampaya gas-to-power project, a saan unay a maus-usar ti lokal a rekursos nupay dakdakkel ti bentahe ti presio daytoy ngem kadagiti ganggannaet a produkto.
Segun ken ni Cruz, ₱4.80 kada kilowatt-hour ti koriente a parnuayen ti Malampaya gas, idinto a ₱10.30 kada kilowatt-hour ti koriente nga aggapu iti imported a liquefied natural gas (LNG).
Insingasing daytoy ti PAP kabayatan ti panagadal dagiti mammanday-linteg maipanggep iti pannakasuspenso ti fuel excise tax gapu iti gubat iti Middle East.
Dati a sekretario ti DILG Sarmiento, nadutokan a baro nga adviser ti OPAPRU
Ilunglungalong ketdi ti PAP ti komprehensibo a pannakaipatungpal ti Republic Act No. 12120, wenno ti Philippine Natural Gas Industry Development Act.
Iti sabali a bangir, makium-uman ita ti Department of Energy (DoE) kadagiti pribado nga stakeholder a mangimaton iti lana ti pagilian.
Nupay mangmangted ti gobierno iti baro a kontrata para iti panangparnuay iti lana, impaganetget ti PAP a masapul nga ipangruna ti gobierno ti pannakaikkat ti nangina nga LNG ken panagusar iti parnuay ti pagilian. (Manila Bulletin Newsroom/Manila Bulletin//Lito Hilidon/Bannawag)
